Mannauður. Ossur.com

Mannauður

Við erum hátæknifyrirtæki og árangur þess undir hæfu og metnaðarfullu starfsfólki kominn.

Við leggjum ríka áherslu á að hjá fyrirtækinu starfi hæft starfsfólk sem er tilbúið að leggja sig fram, sýnir frumkvæði og er með jákvætt viðhorf. Við leggjum áherslu á gott starfsumhverfi sem stuðlar að samvinnu, jákvæðni og frumkvæði.

Gildin okkar

Heiðarleiki

Við sýnum virðingu með því að halda okkur við staðreyndir, standa við gefin loforð, uppfylla kröfur og viðurkenna mistök. Við stuðlum að heiðarlegum samskiptum innan fyrirtækisins m.a. með því að deila upplýsingum og bera virðingu fyrir ólíkum störfum hvers annars.

Hagsýni

Við notum fjármuni fyrirtækisins af skynsemi. Við höfum það að markmiði að halda kostnaði í lágmarki á öllum sviðum rekstursins með skilvirkum samskiptum, árangursríku skipulagi, stöðugum umbótum og bættum vinnuferlum.

Hugrekki

Við nýtum frelsi okkar til athafna, erum opin fyrir breytingum og keppum stöðugt að framförum. Við bjóðum óskrifuðum reglum birginn, sýnum frumkvæði og tökum meðvitaða áhættu. Jafnframt tökum við ábyrgð á hugmyndum okkar, ákvörðunum og athöfnum.

Við bætum hreyfanleika fólks

Við leggjum áherslu á að laða til okkar og ráða metnaðarfulla einstaklinga sem eru hæfir til að takast á við krefjandi verkefni í síbreytilegu umhverfi. Starfstitlar skipta okkur litlu máli, það að er framlag hvers og eins sem skiptir máli. Við sækjumst eftir ástríðufullum einstaklingum sem deila okkar sýn og áhuga til að skapa líf án takmarkana fyrir viðskiptavini okkar.
Okkar umhverfi hentar einstaklingum sem eru hugmyndaríkir, hugrakkir, hugsa til framtíðar og vilja upplifa að framlag þeirra skipti máli.

Vöxtur og starfsþróun

Við erum meðvituð um mikilvægi endurmenntunar starfsfólks og starfsþróun. Við leggjum áherslu á að að starfsfólk sé vel upplýst og meðvitað um nýjungar í sinni starfsgrein þannig að fyrirtækið sé ávallt fremst á sínu sviði. Við berum sjálf ábyrgð á því að fylgjast með nýjungum í starfsgrein okkar. Til að fyrirtækið geti vaxið, þróast og haldið samkeppnisforskoti í síbreytilegu alþjóðaumhverfi, er mikilvægt að starfsfólk okkar fái tækifæri og svigrúm til að bæta þekkingu sína og færni.

Fjölbreytileiki - Jafnrétti

Við leggjum áherslu á jafnrétti, í sama hvaða mynd það er. Við höfum viðhaldið jafnlaunavottun frá 2017 og er markmið okkar að mismuna ekki starfsfólki og nýta hæfni, krafta og kunnáttu starffólks til fulls. Heildarfjöldi starfsfólks fyrirtækisins á heimsvísu er um 4.000. Á Íslandi eru um 700 einstaklingar frá 36 þjóðlöndum og eru um 50% starfsfólks konur. Í jafnréttisáætlun Össurar eru stjórnendur og starfsfólk minnt á mikilvægi þess að allir fái notið sín án tillits til kynferðis, trúarbragða, skoðana, þjóðernis, kynþáttar, kynhneigðar, aldurs eða stöðu. Sjá meira um samfélagslega ábyrgð Össurar á heimasíðu Embla Medical.

Jafnlaunastefna Össurar

Við störfum samkvæmt jafnlaunakerfi sem nær til alls starfsfólks Össurar á Íslandi.

Tilgangur Össurar með jafnlaunakerfi er að tryggja jafnrétti og jafna stöðu starfsfólks óháð kyni, innan fyrirtækisins. Markmiðið er að nýta hæfni, krafta og kunnáttu starfsfólks til fulls án þess að kynbundinn mismunur eigi sér stað.

Samhliða jafnlaunastefnu störfum við samkvæmt jafnréttisstefnu Össurar og höfum sett okkur jafnréttisáætlun. Með jafnréttisáætluninni eru stjórnendur og starfsfólk minnt á mikilvægi þess að allir fái notið sín í starfi í Össuri óháð kyni, kynþætti, þjóðernisuppruna, trú, lífsskoðana, fötlun, skertri starfsgetu, aldri, kynhneigð, kynvitund, kyneinkennum eða kyntjáningu.

Launajafnrétti

Kynjum skulu greidd jöfn laun, njóta sömu kjara fyrir jafn verðmæt eða sambærileg störf sem og hvers konar frekari þóknana og njóta sömu kjara hvað varðar lífeyris-, orlofs- og veikindarétt og hver önnur starfskjör eða réttindi sem metin verða til fjár.

Jafnlaunastefnan er unnin samræmi við þau lög og reglugerðir sem fjalla um jafna stöðu og jafnan rétt kynjanna og er hluti af launastefnu Össurar. VP of People Iceland skal vera meðvitaður um að stöðugar umbætur þurfa að eiga sér stað.

Yfirstjórn skal setja fram jafnlaunamarkmið og rýna jafnlaunakerfið árlega. Jafnlaunamarkmið skulu endurskoðuð út frá niðurstöðum launagreiningar. Stjórnendur skulu einnig skuldbinda sig til að viðhalda stöðugum umbótum, eftirliti og bregðast við óútskýrðum launamun og þeim frávikum sem koma fram við rýni á jafnlaunakerfinu.

WI-00369, rev.3

Jafnvægi vinnu og einkalífs

Við leggjum áherslu á að bjóða upp á umhverfi og sveigjanleika sem stuðlar að jafnvægi á milli vinnu og einkalífs.

Heilsuefling og félagslíf

Við stuðlum að heilbrigðum lífsstíl með því að hvetja starfsfólk til heilsueflingar sem eykur heilsu og vellíðan bæði innan og utan vinnustaðar. Markmið heilsustefnu okkar er fyrst og fremst að gera starfsfólki auðveldara um vik að tileinka sér heilbrigðan lífsstíl m.a. með því að veita árlegan heilsufarsstyrk, aðgengi að hollu og fjölbreyttu fæði, heilsufarsráðgjöf, heilsueflandi fræðslu og fleira. Á vinnustaðnum er líkamsræktaraðstaða og golfhermir. Innan fyrirtækisins er virkt félagslíf þar sem boðið er upp á fjölbreytta viðburði innan og utan vinnu þar sem flestur ættu að geta fundið eitthvað við sitt hæfi. Má þar nefna samkomur á vegum fyrirtækis og/eða starfsamannafélags og aðgengi að ýmsum hópum eins og golfklúbbi, gönguhópi og hlaupahópi svo eitthvað sé nefnt.

Sjálfboðaliðadagurinn

Við leggjum ríka áherslu á samfélagslega ábyrgð. Give Back verkefnið er liður í því að gefa starfsfólki fyrirtækisins um allan heim tækifæri til að vinna einn dag á ári í sjálfboðavinnu á launum. Starfsfólk er þannig hvatt til að finna samtök eða félög sem þurfa á aðstoð að halda og leggja sitt af mörkum til samfélagsins.

Kannaðu laus störf

Sækja um starf

Starfsánægja

Við framkvæmum vinnustaðagreiningar með reglubundnum hætti með það að markmiði að hlúa að starfsfólki, viðhalda hvetjandi og góðu starfsumhverfi og vinna stöðugt að umbótum of framþróun á vinnustað okkar. Starfsánægja hefur heilt yfir alltaf verið há hjá fyrirtækinu og starfsfólk upplifir ríkan tilgang með starfi sínu í þeim geira sem við störfum.

Embla Medical | Össur - Mannauðsdeild

Mannauðsdeild fyrirtækisins leggur áherslu á að veita núverandi og mögulegu framtíðarstarfsfólki fyrirtækisins framúrskarandi þjónustu og stuðning. Mannauðsdeildin er staðsett í höfuðstöðum fyrirtækisins að Grjóthálsi 5. Hægt er að senda fyrirspurnir og nálgast okkur með því að senda tölvupóst á netfangið [email protected]

Ef þú telur okkar vinnustað geta hentað þínum gildum, viðhorfi og hæfni, endilega sendu inn starfsumsókn í gegnum umsóknarkerfi fyrirtækisins: Workday