Tillaga um stofnun móðurfélagsins Embla Medical samþykkt
Framkvæmdastjórar hjá Novo Nordisk og Atos taka sæti í stjórn Emblu Medical hf. (áður Össur hf.)
Tillaga um stofnun móðurfélagsins Embla Medical var samþykkt á aðalfundi.
----------
Á aðalfundi Össurar hf., sem fram fór í dag, samþykktu hluthafar tillögu um að móðurfélag Össurar taki upp nafnið Embla Medical hf. Þetta felur í sér að vörumerkin Össur, College Park, Fior & Gentz og ForMotion starfa framvegis undir hatti Emblu Medical. Nýtt skipulag gerir félagið betur í stakk búið til að halda áfram sókn sinni á nýja og stærri markaði og hlaut tillagan góðan stuðning á fundinum. Starfsemi Össurar verður óbreytt, eftir tilkomu móðurfélagsins, með áframhaldandi þróun, framleiðslu og sölu á stoð- og stuðningstækjum.
Einnig voru tveir nýir stjórnarmeðlimir kosnir í stjórn félagsins. Þetta eru þær Tina Abild Olesen, framkvæmdastjóri hjá lyfjafyrirtækinu Novo Nordisk og Caroline Vagner Rosenstand, forstjóri lækningatækjaframleiðandans Atos Medical, dótturfélags Coloplast.
Guðbjörg Edda Eggertsdóttir, sem setið hefur í stjórn Össurar frá árinu 2013, sóttist ekki eftir endurkjöri. Aðrir í stjórn félagsins eru Niels Jacobsen, stjórnarformaður, Svafa Grönfeldt, varaformaður, Alberto Esquenazi og Arne Boye Nielsen.
Höfuðstöðvar Emblu Medical eru á Íslandi. Heildarfjöldi starfsfólks fyrirtækisins á heimsvísu er um 4.000, þar af eru um 700 sem starfa á Íslandi. Félagið er skráð í kauphöllinni í Kaupmannahöfn.
Sveinn Sölvason, forstjóri Emblu Medical:
„Stofnun móðurfélagsins Embla Medical er mikilvægt skref í þróun félagsins og styður vel við okkar markmið og tilgang, sem í grunninn snýst um að styðja við sem flesta einstaklinga sem þurfa á okkar vörum og þjónustu að halda,“ segir Sveinn Sölvason, forstjóri Emblu Medical og bætir við: „Um leið og ég vil þakka Guðbjörgu Eddu fyrir gott samstarf í rúman áratug þá er mikill fengur fyrir félagið að fá tvær nýjar og öflugar konur inn í stjórnina. Báðar eru þær lykilstjórnendur hjá alþjóðlegum heilbrigðistæknifyrirtækjum sem hafa náð framúrskarandi árangri á sínu sviði. Tina hjá Novo Nordisk er jafnframt varaforseti Alþjóða sykursýkisstofnunarinnar og Caroline forstjóri hjá Atos Medical, sem er vaxandi félag á sviði lækningatækja. Þekking og reynsla þeirra mun nýtast okkur afar vel við frekari uppbyggingu á Emblu Medical sem alþjóðlegs heilbrigðistæknifyrirtækis.“